Við erum til þjónustu reiðubúin!

Kæri atvinnurekandi á Norðurlandi vestra

Margir eru nú í óvissu með framtíð síns rekstrar. Kynnt hafa verið ýmis úrræði en enn er óvíst um framkvæmd þeirra og hvað þau í raun þýða fyrir fyrirtæki og einstaklinga. Við munum fylgjast grannt með framvindunni og miðla upplýsingum til fyrirtækja í landshlutanum. Við heyrum á þeim sem við tölum við að óvissan tekur í og margir eru skiljanlega áhyggjufullir um framhaldið.

Atvinnuráðgjafar okkar eru til þjónustu reiðubúnir – endilega heyrið í okkur, bæði ef ykkur vantar aðstoð en líka til að leyfa okkur að fylgjast með hver staðan er svo við getum miðlað sem bestum upplýsingum til stjórnvalda um stöðuna í landshlutanum hverju sinni.

Höfum í huga að skaflinn, sem fyrir framan okkur er, mun á endanum taka upp. Þetta gengur yfir.

Nokkur góð ráð:

• Passið upp á heilsuna, bæði andlega og líkamlega. Góður göngutúr eða léttar líkamsæfingar heimavið létta lundina og gera okkur gott.
• Hugið að starfsfólkinu ykkar og gerið það sem þið getið til að viðhalda ráðningarsambandi við það, svo ekki þurfi að ráða nýtt fólk með tilheyrandi kostnaði þegar allt er yfir staðið.
• Verið í góðu sambandi við ykkar stærstu viðskiptavini og birgja. Góð og opin samskipti eru lykill að því að semja um framhaldið ef þörf verður á því.
• Fylgist vel með úrræðum stjórnvalda og hvað mun nýtast ykkur í ykkar rekstri. Á heimasíðu SSNV er yfirlit yfir úrræðin sem uppfært er um leið og breytingar verða eða útfærslur skýrast.
• Leitaðu til atvinnuráðgjafa SSNV til að fá aðstoð við að uppfæra áætlanir, endurskipuleggja reksturinn eða fá ráð varðandi endurfjármögnun þegar sá tími kemur.
• Nú er hjá mörgum tíminn sem aldrei kemur – þegar róast….nýtum hann í að vinna verkefnin sem við höfum ekki komist í, uppfæra heimasíðuna, vinna markaðsefni, taka til á skrifstofunni, þrífa o.s.frv. Eins og góður maður sagði einu sinni: „Stökktu áhyggjum þínum á flótta með annríki, það er besta lyfið“.

Það er seigt í okkur á Norðurlandi vestra. Aðstæður eru vissulega meira krefjandi nú en oft áður en við munum komast í gegnum þetta – með góðri samvinnu og stuðningi hvers annars.

Áfram Norðurland vestra!