Undirbúningur Skógarplantna ehf. að uppsetningu á nýstárlegri gróðurstöð er í fullum gangi

Fulltrúar frá Skógarplöntum ehf. ásamt Magnúsi Barðdal verkefnastjóra frá SSNV vinna nú að uppsetningu á nýstárlegri gróðurstöð til framleiðslu á skógarplöntum í Miðfirði í Húnaþingi vestra. Í tengslum við það fór hópurinn í ferð til Svíþjóðar og Hollands á dögunum til að kynna sér aðrar sambærilegar gróðurstöðvar og skoða búnað frá framleiðendum. Verkefnið hefur verið í undirbúningi í um tvö ár og standa vonir til að framkvæmdir hefjist á árinu.

 

Leitast verður við að hafa gróðurstöðina með fullkomnustu tækjum sem völ er á sem tryggir hámarksnýtingu á gróðurhúsum og jöfn gæði í allri framleiðslunni.

 

Björn Líndal Traustason er framkvæmdastjóri Skógarplantna ehf. og er fulltrúi Kaupfélags vestur Húnvetninga sem er einn af stærstu hluthöfum í félaginu ásamt Hafbergi Þórissyni eiganda Lambhaga gróðurstöðvar. Jafnframt er Skúli Húnn Hilmarsson og Magnús Barðdal í verkefnahóp um uppbyggingu á gróðurstöðinni.