SSNV gengur í Eim

F.v. Eyþór Björnsson, forstjóri Norðurorku, Lára Halldóra Eiríksdóttir, stjórnarformaður SSNE, Hörður Arnarson, forstjóri landsvirkjunar, Guðlaugur Þór Þórðarson, umhverfis-, orkur- og loftslagsráðherra, Katrín M. Guðjónsdóttir, framkvæmdastjóri SSNV og Benedikt Þór Jakobsson, rekstrarstjóri Orkuveitu Húsavíkur

Samtök sveitarfélaga á Norðurlandi vestra ásamt bakhjörlum Eims, umhverfis-, orku- og loftslagsráðuneytið, Landsvirkjun, Samtök sveitarfélaga- og atvinnuþróunar á Norðurlandi eystra, Norðurorka og Orkuveita Húsavíkur undirrituðu í dag samkomulag um inngöngu SSNV í Eim. Eimur hefur það meginmarkmið að bæta nýtingu auðlinda með verðmætasköpun, sjálfbærni og nýsköpun að leiðarljósi. Nú spannar starfssvæði félagsins allt Norðurland.

Með aðild SSNV nær starfssvæði Eims yfir allt Norðurland. Mikil tækifæri eru fólgin í vexti Eims yfir á Norðurland vestra. Landshlutinn er mikil matarkista, með framleiðslu á landbúnaðarvörum og öflugri útgerð. Þá er starfsemi Landsvirkjunar umtalsverð á svæðinu og útlit er fyrir aukna orkuvinnslu á Blöndusvæði í náinni framtíð.

Félagið Eimur var stofnað árið 2016 og hefur sinnt verkefnum sem snúa að fjölnýtingu jarðvarma, stuðningi við nýsköpun, orkuskiptum og innleiðingu hringrásarhagkerfis t.a.m. í iðnaði. Í dag starfa fimm hjá Eimi, og með stækkuninni verða ráðnir tveir nýir starfsmenn með skrifstofu á Norðurlandi vestra. Eimur var fyrirmyndin að stofnun sambærilegra verkefna, Orkídeu á Suðurlandi, Bláma á Vestfjörðum og Eygló á Austurlandi.

Eimur miðar að því að leiða saman fólk og fyrirtæki til samstarfs um tilraunir, rannsóknir og þróunarverkefni á sviði orku-, auðlinda-, og loftslagsmála, meðal annars gegnum alþjóðleg samstarfsverkefni. Þetta er besta leiðin til þess að flytja inn þekkingu á því hvernig aðrar þjóðir takast á við áskoranir samtímans, og sú þekking er svo nýtt til að gera slíkt hið sama hér innanlands.

„Það er mikið gleðiefni að undirrita stækkun á samstarfssvæði Eims yfir á Norðurland-vestra í dag. Við höfum lagt á það áherslu undanfarin tvö ár að styrkja og styðja við nýsköpunarstarfsemi um land allt. Samvinna ráðuneytisins við landshlutasamtökin og Landsvirkjun í svæðisbundnum samstarfsverkefnum um nýsköpun hefur skilað margfalt meira fjármagni inn á svæðin heldur en við höfum sett inn. Það skiptir máli að nýta hugvit og sköpunarkraft heima í héraði.“

Guðlaugur Þór Þórðarson, umhverfis-, orku- og loftslagsráðherra.

„Við erum að stíga mikilvægt skref. Nýsköpun er grundvöllur efnahagslegrar velgengni í nútíma samfélagi. Hugvit einstaklinga er mikilvægasta uppspretta nýsköpunar og hér á Norðurlandi vestra höfum við aðgengi að fjölbreyttum auðlindum sem hægt er að nýta til aukinnar verðmætasköpunar. Með tilkomu Eims inn á svæðið getum við virkjað þau fjölmörgu tækifæri sem hér leynast á markvissari hátt en áður“.

Katrín M Guðjónsdóttir framkvæmdastjóri SSNV.

„Eimur hefur sýnt það í verki á undanförnum árum að góð og vel skilgreind samvinna getur verið lykill að árangri í loftslagsmálum. Með stækkun starfsemi Eims yfir á Norðurland vestra verða til fleiri og fjölbreyttari tækifæri til atvinnuuppbyggingar og nýsköpunar á landsvæðinu. Það er öllum í hag að nýta auðlindir okkar betur, hvort sem þær tengjast orkuvinnslu eða hliðarstraumum iðnaðar og landbúnaðar. Það er mikill fengur að fá SSNV inn í verkefnið, enda eru tækifærin í landshlutanum fjölbreytt og spennandi. Við hlökkum til samstarfsins.“

Hörður Arnarson, forstjóri Landsvirkjunar.

 F.v. Eyþór Björnsson, forstjóri Norðurorku, Albertína Fr. Elíasdóttir, framkvæmdastjóri SSNE, Guðlaugur Þór Þórðarson, umhverfis-, orku- og loftslagsráðherra, Lára Halldóra Eiríksdóttir, stjórnarformaður SSNE, Ottó Elíasson, framkvæmdastjóri hjá Eimi, Einar Eðvald Einarsson, stjórnarformaður SSNV , Katrín M. Guðjónsdóttir, framkvæmdastjóri SSNV, Hörður Arnarson, forstjóri Landsvirkjunar og Benedikt Þór Jakobsson, rekstrarstjóri Orkuveitu Húsavíkur.