Jólin heima er framúrskarandi verkefni á sviði menningar

Magnús Barðdal Reynisson atvinnuráðgjafi hjá SSNV og Jóhann Daði Gíslason verkefnisstjóri tónleikanna.

Verkefnið Jólin heima, sem hefur fest sig í sessi sem árviss menningarviðburður í Skagafirði, hefur verið valið Framúrskarandi verkefni ársins 2024 hjá SSNV. Tónleikarnir, sem leiddir eru af Jóhanni Daða Gíslasyni, hafa skapað sér sérstakan stað í hjörtum heimamanna.

Jólin heima eru árlegir jólatónleikar sem gefa skagfirsku tónlistarfólki tækifæri á að koma fram og flytja bæði frumsamin og þekkt jólalög sem allir kunna og geta sungið með. Á tónleikunum hefur skapast einstakt andrúmsloft sem endurspeglar menningarauð og samstöðu í samfélaginu.

Verkefnið hefur bætt miklu við annars blómlegt menningarstarf svæðisins og er mikilvæg áminning um mikilvægi þess að halda í heimafólk og hæfileika þess - sérstaklega á hátíð ljóss og friðar.

Það var árið 2020, í miðjum heimsfaraldri, sem fyrstu tónleikarnir voru haldnir og þá í beinu streymi. Þrátt fyrir erfiðar aðstæður voru tónleikarnir afar vel sóttir og innkoman nýtt til að styrkja fjölskylduhjálp Skagafjarðar. Síðan þá hefur umgjörð tónleikanna stækkað jafnt og þétt í takt við aukna eftirspurn.

Verkefnið Jólin heima er því mikilvægur þáttur í að styrkja menningartengdar hefðir í Skagafirði og skapa samheldni og gleði í aðventunni.

Innilega til hamingju með viðurkenninguna.