Elín Aradóttir nýr verkefnastjóri MN staðsett á Norðurlandi vestra

Elín Aradóttir hefur verið ráðin sem verkefnastjóri markaðs- og áfangastaðaþróunar hjá Markaðsstofu Norðurlands. Verkefnastjóri vinnur í nánu samstarfi við ferðaþjónustuaðila og sveitarfélög á öllu Norðurlandi að þróun og markaðssetningu áfangastaðarins. Hún kemur til starfa hjá MN um miðjan september.

 

Starfsstöð Elínar verður á Blönduósi og hún þekkir Norðurland vel, þar sem hún hefur búið víða í landshlutanum og ólst upp í Reykjadal í Þingeyjarsveit. Hún lauk M.Sc. prófi í skipulags- og þróunarfræðum frá háskólanum í Guelph í Ontario, Kanada, B.Ed. kennaraprófi frá KÍ og diplomu í rekstrarfræði frá Háskólanum á Bifröst.

 

Elín hefur töluverða reynslu úr ferðaþjónustu, af verkefnastjórnun og nýsköpun. Hún hefur á síðustu árum rekið vefverslunina tundra.is og sveitaverslunina á Hólabaki í Húnabyggð. Auk þess er hún í sveitarstjórn Húnabyggðar og hefur sinnt margvíslegum félags- og stjórnunarstörfum. Þá var hún verkefnastjóri hjá Atvinnuþróunarfélagi Eyjafjarðar frá 2012-2013 og starfaði þar áður í sex ár sem verkefnastjóri hjá Nýsköpunarmiðstöð Íslands

 

Við hjá SSNV fögnum nýju stöðugildi Markaðsstofu Norðurlands á Norðurlandi vestra og teljum að það muni hafa vaxandi áhrif á ferðaþjónustu á svæðinu. Við óskum Elínu til hamingju með starfið og hlökkum til að vinna með henni í framtíðinni.