Hönnun nýrra þekkingargarða á Sauðárkróki kynnt

Hönnun nýrra þekkingargarða á Sauðárkróki leit dagsins ljós í liðinni viku, en garðarnir eru hannaðir af dönskum arkitektum

SSNV er þátttakandi í spennandi verkefni um uppbyggingu nýsköpunargarða í Skagafirði í samvinnu við Háskólann á Hólum, Hátæknisetur Íslands og Fjölbrautaskóla Norðurlands vestra. Í liðinni viku var kynningarfundur með fulltrúum sveitarstjórnar í Skagafirði og fleiri aðilum þar sem dönsku arkitektarnir frá NORRØN ásamt Magnúsi Frey Gíslasyni arkitekt kynntu fyrstu drög að hönnun á görðunum.

Í verkefninu felast mikil tækifæri til að skapa störf á svæðinu og leggja grunn að fjölbreyttari atvinnu tengt nýsköpun og matvælaframleiðslu. Ástæðan fyrir því að farið var af stað í verkefnið er sú að einstakt tækifæri til uppbyggingar á þekkingargörðum skapast með uppbyggingu sérhæfðs kennsluhúsnæðis á Sauðárkróki og með myndun Háskólasamstæðu Háskóla Íslands og Háskólans á Hólum. Skagafjörður er eitt öflugasta matvælaframleiðslu hérað landsins með einstakt aðgengi að fjölbreyttu hráefni sem styrkir verkefnið enn frekar. Það er von okkar að verkefnið muni leiða af sér fjölda nýrra starfa og ný fyrirtæki sem munu efla Norðurland vestra í heild.  

Verkefnið hlaut styrk úr Lóu nýsköpunarsjóði fyrir landsbyggðina og var kynningin m.a. hluti af þeirri vinnu.

Þekkingargarðar á Sauðárkróki - hönnun frá NORRØN 

Í október sl. lagði þessi hópur í undirbúningsferð fyrir þekkingargarða til Svíþjóðar. Magnús Barðdal Reynisson, verkefnastjóri hjá SSNV, Árni Gunnarsson, fulltrúi FNV, Hólmfríður Sveinsdóttir, rektor við Háskólann á Hólum og Einar Einarsson forseti sveitarstjórnar í Skagafirði ásamt Inga Jónassyni, framkvæmdastjóra Science park Skövde.